मानस  वंदना 

बंदउँ गुरु पद पदुम परागा ।
सुरुचि सुबास सरस अनुरागा ॥

जनकसुता जग जननि जानकी ।
अतिसय प्रिय करुनानिधान की ॥

ताके जुग पद कमल मनावउँ ।
जासु कृपाँ निरमल मति पावउँ ॥

पुनि मन बचन कर्म रघुनायक ।
चरन कमल बंदउँ सब लायक ॥

राजिवनयन धरें धनु सायक ।
भगत बिपति भंजन सुखदायक ॥

प्रनवउँ प्रथम भरत के चरना ।
जासु नेम ब्रत जाइ न बरना ॥

बंदउँ लछिमन पद जल जाता ।
सीतल सुभग भगत सुख दाता ॥

रिपुसूदन पद कमल नमामी ।
सूर सुसील भरत अनुगामी ॥

महाबीर बिनवउँ हनुमाना ।
राम जासु जस आप बखाना ॥

गुरु पितु मातु महेस भवानी ।
प्रनवउँ दीनबंधु दिन दानी ॥

करन चहउँ रघुपति गुन गाहा ।
लघु मति मोरि चरित अवगाहा ॥

निज बुधि बल भरोस मोहि नाहीं ।
तातें बिनय करउँ सब पाहीं ॥

बंदउँ नाम राम रघुबर को ।
हेतु कृसानु भानु हिमकर को ॥

जड़ चेतन जग जीव जत सकल राममय जानि ।
बंदउँ सब के पद कमल सदा जोरि जुग पानि ॥

राम चरन रति जो चह अथवा पद निर्बान ।
भाव सहित सो यह कथा करउ श्रवन पुट पान ॥